Un movement nacionalista d'esquèrra tà la sobiranetat flamenca


Meervoud qu'ei un movement nacionalista d'esquèrra qui persegueish la sobiranetat flamenca. Los sons objectius estrategics que son: l'ahortida de la consiéncia nacionau flamenca, la sobiranetat nacionau e la sobiranetat populara au còr d'un Estat flamenc. Aquò vòu díser que la democracia, qui estó matada peu capitau mondiau e peu neoliberalisme, e deu estar restablida en Flandra. Qu'ei pr'aquò qu'editam la revista mesadèra aperada ''Meervoud'', e tanben libes e autas publicacions. Dab aqueras publicacions, que i a autas activitats qui's pòden debanar

Despuish la vaduda de l'Estat bèlga en 1830 lo poder de las classas gavidairas bèlgas que's basa sus la grana industria nacionau. Mes despuish las annadas '80 deu sègle darrèr, uas causas qu'an cambiat : la borgesia bèlga que s'ei integrada a grops capitalistas multinacionaus. Aqueths qu'impausan aus pòbles europèus ua politica neoliberau : qu'ei sustot au travèrs de las institucions de l'Union europèa qu'aquò e's hè. Aquera politica que mia au desmantelament deus mecanismes de proteccion sociau e a la supression de la democracia.

La classa gavidaira en Belgica que's mantien totun lo poder, ahortida peu capitau mondiau, mes que's perd de mei en mei l'egemonia ideologica entà la populacion. Perqué? Entà's mantiéner lo poder que deu har de mei en mei hèitas antisociaus e mejans antidemocratics. La principau manièra entà d'eliminar la democracia qu'ei lo transferiment de competéncias aus organismes supranacionaus qui'n son pas sancionats per l'escrutin.

Pr'amor de la pèrta d'empresa ideologica de la classa gavidaira bèlga, lo quadre de referéncia comun de la Flandra e de la Valonia que s'arròd. Lo nacionalisme oficiau de l'Estat bèlga que deu har arrepè cap aus dus pòbles, Flamencs e Valons qui coabitan en son bèth miei despuish 1830. L'interès comun bèlga que s'eclipsa: chic a chic los contorns d'ua vision navèra de l'interès generau que pren fòrma. Aquera n'ei pas mei bèlga, mes valona o flamenca.

Los nacionalistas flamencs d'esquèrra qu'an definit las prioritats qui segueishen:
  • Ahortida de la consciéncia nacionau flamenca. Entà d'aquò, l'espandida de la lenga neerlandesa (7au lenga europèa, parlada per 22 milions de personas aus País Baishs e en Flandra). L'arrespècte de las leis linguisticas que deu estar assegurat a Brussèlas e a l'entorn. Lo consumerisme individualista qui està plan, e on l'anglès ei la lenga majorau, que deu estar combatut. La non-discriminacion e l'integracion deus imigrats en Flandra que deven estar realizadas, en permete'us d'aquesir las competéncias lingüisticas qui hèn hrèita.
  • La sobiranetat nacionau tà la Flandra, com Estat independent en ua confederacion d'estats europèus. (L'Union europèa qu'arreduseish los pòbles en etnias o regions, en dispausar d'ua autonomia culturau limitada e enqüèra mensh d'autonomia socioeconomica). L'Estat flamenc que's deu conquesir la sobiranetat en rómper las constrentas deu capitau mondiau qui remplacè la sobiranetat nacionau deus pòbles per la sobiranetat deus accionaris e deus gavidaires.
  • L'Estat flamenc que serà internacionalista, qu'ei tà díser qu'aurà ua obertura de las granas de cap aus autes Estats e aus pòbles. Los problèmas enter pòbles que deven estar redusits per via pacifica. La Flandra sobirana que's deu investir hèra en las relacions dab los país vesins e especiaument dab la Valonia. Los nacionalistas flamencs d'esquèrra que persegueishen ua cooperacion estreta dab tots los movements democratics e sobiranistas en Euròpa e en lo monde.
  • Tà sauvaguardar la democracia, los nacionalistas flamencs d'esquèrra que creden necessari la restablida de la sobiranetat populara. Aquò vòu díser que tota autoritat de l'Estat que deu emanar deu pòble e miralhar la volentat deu pòble. L'òrdi juridic interior qu'ei doncas democratic. Ne i a pas nada legitimitat demoratica hòra eth. Atau qu'arrebocam la legitimitat de las tecnocracias supranacionaus antidemocraticas tau com l'UE, lo FMI, l'OTAN, l'OMC, etc.

Que volem virar l'òrdi democratic en un sens qui permeti lo desvolopament socioeconomic de la nacion. Un contaròtle democratic deu capitau que hè doncas hrèita, tau com un quadre contractuau enter las enterpresas e las autoritats politicas (qui poscan guarantir l'arrespècte de nòrmas sociaus e ecologicas e assegurar la participacion deus sindicats e consumidors).
Puish, un sistèma fiscau equitader, lo plen emplec, la seguritat sociau guarantits.. Tot aquò que supausa la rompedura dab las recèptas politicas neoliberaus.

Lo restablida de la democracia per la sobiranetat populara que contribuirà a redusir lo perider enter los rics e los praubes en Flandra. Qu'ei la mei bona via entà d'assegurar la prosperitat e lo plan-estar deu pòble flamenc.

Brussèlas, març de 2005